ಅಭಿವೃದ್ದಿಗಾಗಿ ಎದುರು ನೋಡುತ್ತಿದೆ: ಶರಣ ಶ್ರೀ ಕುಳುವ ನುಲಿಯ ಚಂದಯ್ಯನವರ ಅವಶೇಷಗಳು

"ಕುಳುವ ವಾಣಿ" ಯ ಸಂದೇಶ......✍️

"ಅಭಿವೃದ್ದಿಗಾಗಿ ಎದುರು ನೋಡುತ್ತಿದೆ ನುಲಿಯ ಚಂದಯ್ಯನವರ ಅವಶೇಷಗಳು"

12 ನೇ ಶತಮಾನದಲ್ಲಿ ಬಸವಣ್ಣನವರು ವೈದಿಕ ಧರ್ಮವನ್ನು ಧಿಕ್ಕರಿಸಿ ಕಲ್ಯಾಣ ಕ್ರಾಂತಿ ಮಾಡಿದಾಗ ಅದರಲ್ಲಿ ಪಾಲ್ಗೊಂಡು ಹಲವಾರು ವರ್ಷಗಳ ಕಾಲ ಬಸವ ಧರ್ಮ ಪ್ರಚಾರ ಮಾಡುತ್ತ ಬಸವಣ್ಣನವರ ಲಿಂಗೈಕ್ಯದ ನಂತರವೂ ಶರಣರ ವಚನಗಳನ್ನು ತನ್ನ ಹೆಗಲಿಗೆ ಕಟ್ಟಿಕೊಂಡು, ಕಾಡು ಮೇಡುಗಳಲ್ಲಿ ಅಲೆಯುತ್ತಾ ಕರ್ನಾಟಕದಾದ್ಯಂತ ಸಂಚರಿಸಿ ಬಸವಧರ್ಮ ಪ್ರಚಾರ ಮತ್ತು ಅನ್ನ ದಾಸೋಹ ಮಾಡುತ್ತ ಸಂಚಲನ ಮೂಡಿಸಿದ,

"ಕುಳುವ ಭಾಷೆಯನ್ನಾಡುವ" ನಮ್ಮ ಸಮಾಜದ, ಶರಣ ನುಲಿಯ ಚಂದಯ್ಯನವರು,

ಚಂದಯ್ಯನವರು ಒಮ್ಮೆ ತಮ್ಮ ಇಷ್ಟಲಿಂಗ ಚಂದೇಶ್ವರನ ಸ್ಮರಣೆ ಮಾಡುತ್ತ ಹುಲ್ಲು ಕುಯುತ್ತಾ ತನ್ನ ಕಾಯಕದಲ್ಲಿ ಮಗ್ನರಾಗಿದ್ದಾಗ, ತನ್ನ ಕೊರಳಲ್ಲಿದ್ದ ಇಷ್ಟಲಿಂಗವು ಕಳಚಿ ಬೀಳುತ್ತದೆ, ಕ್ಷಣಕಾಲ ನಿಬ್ಬೆರಗಾದ ಚಂದಯ್ಯ, ಲಿಂಗವನ್ನು ಹುಡುಕುವ ಗೋಜಿಗೆ ಹೋಗದೆ ತನ್ನ ಕಾಯಕವನ್ನು ಮುಂದುವರಿಸುತ್ತಾರೆ, ಸ್ವಲ್ಪ ಸಮಯದ ನಂತರ ಇದನ್ನು ಕಂಡ

"ಮಡಿವಾಳ ಮಾಚಯ್ಯ" ಚಂದಯ್ಯನನ್ನು ಉದ್ದೇಶಿಸಿ ಇಷ್ಟ ಲಿಂಗವೆಲ್ಲಿ..? ಎಂದು ಪ್ರಶ್ನಿಸುತ್ತಾರೆ, ಅದಕ್ಕೆ ಚಂದಯ್ಯನವರು ನನ್ನ ಕಾಯಕ ನಾನು ಮಾಡುತ್ತಿದ್ದೇನೆ, ಲಿಂಗದ ಕಾಯಕ ಲಿಂಗ ಮಾಡಲು ಹೋಗಿದೆ ಎಂದು ನಗುತ್ತಲೇ ಉತ್ತರಿಸುತ್ತಾರೆ, ಈ ಉತ್ತರದಿಂದ ಆಶ್ಚರ್ಯಚಕಿತರಾದ ಮಾಚಯ್ಯ, ಈ ಪ್ರಸಂಗವನ್ನು ಬಸವಣ್ಣನವರಲ್ಲಿಗೆ ಕೊಂಡೊಯ್ಯುತ್ತಾರೆ,

ಬಸವಣ್ಣನವರು ಚಂದಯ್ಯನನ್ನು ಉದ್ದೇಶಿಸಿ ಹೇಳುತ್ತಾರೆ, ಅಯ್ಯಾ.. ಶರಣರಿಗೆ, ಜಂಗಮ, ಲಿಂಗ, ದಾಸೋಹ, ಕಾಯ, ವಾಚ, ಮನಸ, ಶುಚಿತ್ವ, ಬಹುಮುಖ್ಯ ಇವನ್ನು ಕಳೆದುಕೊಂಡರೆ ಶರಣರು ಆತ್ಮವಿದ್ದು ಚೈತನ್ಯ ಕಳೆದುಕೊಂಡಂತೆ ದಯಮಾಡಿ ಲಿಂಗವನ್ನು ಮತ್ತೆ ಕೊರಳಲ್ಲಿ ಧರಿಸು ಎನ್ನುತ್ತಾರೆ.

ಇದಕ್ಕೆ ನಯವಾಗಿ ಉತ್ತರಿಸುವ ಚಂದಯ್ಯ, ಶರಣರೇ ಸೂರ್ಯ ಹುಟ್ಟುವಾಗಿನಿಂದ ಹಿಡಿದು ಜಗತ್ತಿಗೆ ಕತ್ತಲು ಆವರಿಸುವವರೆಗೂ, ತಾನು ಮಾಡುವ ಎಲ್ಲಾ ಕಾಯಕದಲ್ಲೂ ಲವಶೇಷವೂ ದೋಷ ಬರದಂತೆ ಎಚ್ಚರವಹಿಸುತ್ತಿದ್ದೇನೆ, ಈ ಲಿಂಗಯ್ಯನ ಪೂಜೆಯಾಗಲಿ, ಈತನಿಗೆ ಅರ್ಪಿಸುವ ದಾಸೋಹಕ್ಕಾಗಲಿ,ಯಾವುದೇ ಲೋಪ ಬರದಂತೆ ನಿಗಾ ವಹಿಸಿದ್ದೇನೆ, ಹೀಗಿರುವಾಗ ಈ ಲಿಂಗಯ್ಯನಿಗೆ ನಾನು ಮಾಡಿದ ತಪ್ಪಾದರೂ ಏನು ...?

ಈ ಲಿಂಗಯ್ಯನ ಕಾಯಕವಾದರೂ ಏನು....? ಜಂಗಮಾದಿ ಶರಣರಿಂದಿಡಿದು ಸಕಲ ಪ್ರಾಣಿಗಳ ಹಿತ ಕಾಪಾಡುವುದೇ ಹಾಗಿದೆ ಅಲ್ಲವೇ ಹೀಗಿರುವಾಗ, ಲಿಂಗಯ್ಯ ತನ್ನ ಕಾಯಕ ನಿಷ್ಠೆಯನ್ನು ಮರೆತು, ಎನ್ನ ತೊರೆದು ನನ್ನ ಹಿತವನ್ನು ಮರೆತು ಹೋದವರು, ಲಿಂಗವೇ ಹಾಗಿರಲಿ, ಜಂಗಮನೆ ಹಾಗಿರಲಿ, ಸಾಮಾನ್ಯನೆ ಹಾಗಿರಲಿ ನನಗೆ ಎಲ್ಲರೂ ಒಂದೇ, ನಾನೂ ಲಿಂಗವನ್ನು ಮರು ಧರಿಸಲಾರೆ ಎಂದು ತಿರಸ್ಕರಿಸಿ ಬಿಡುತ್ತಾರೆ, ನಂತರ ಬಸವಾದಿ ಅನೇಕ ಶರಣರ ಒತ್ತಾಯದ ಮೇರೆಗೆ ಮಣಿದು ಚಂದಯ್ಯ ಲಿಂಗ ಧಾರಣೆ ಮಾಡುತ್ತಾರೆ,

ಇಲ್ಲಿ ಗಮನಿಸಬೇಕಾದ ವಿಷಯವೇನೆಂದರೆ. ಇಷ್ಟು ಗಮನಾರ್ಹ ವಿಷಯ ನಡೆಯುತ್ತಿದ್ದರೂ ಚಂದಯ್ಯನವರು ಒಂದು ಕ್ಷಣವೂ ಸುಮ್ಮನಿರದೆ ತನ್ನ ನುಲಿಯುವ ಕಾಯಕವನ್ನು ಮಾಡುತ್ತಲೇ ಇರುತ್ತಾರೆ. ನುಲಿಯ ಚಂದಯ್ಯ ಹಾಗೂ ಇನ್ನೊಬ್ಬ ಶರಣ ಆಯ್ದಕ್ಕಿ ಮಾರಯ್ಯನ ಕಾಯಕ ನಿಷ್ಠೆಯನ್ನು ಕಂಡ ಬಸವಣ್ಣನವರು, ಒಂದು ವಾಕ್ಯವನ್ನು ಉದ್ಗರಿಸುತ್ತಾರೆ. ಅದೇ ಕಾಯಕವೇ ಕೈಲಾಸ ಈ ಮಾತು ಬಸವಣ್ಣನವರಿಂದ ಬಂತು

(ಮತ್ತೊಂದು ಕಥೆಯಲ್ಲಿ ಲಿಂಗನ ಕೈಯ್ಯಲ್ಲಿ ಚಂದಯ್ಯ ಕಾಯಕ ಮಾಡಿಸಿ, ನಂತರ ಲಿಂಗ ಧಾರಣೆ ಮಾಡುತ್ತಾರೆ ಎಂದಿದೆ)

ಇದನ್ನು ನಾನು ಇಲ್ಲಿ ಒಪ್ಪುವುದಿಲ್ಲ ಕಾರಣ ಬಸವಣ್ಣನವರು ವೈದಿಕ ಧರ್ಮದ, ಮೂರ್ತಿ ಪೂಜೆಯನ್ನು, ಅವತಾರವನ್ನು, ದೇವರು ಮೈಮೇಲೆ ಬರುವುದನ್ನು , ಆಚಾರ ವಿಚಾರಗಳನ್ನು ದಿಕ್ಕರಿಸಿದವರು, 

ಇಷ್ಟ ಲಿಂಗವನ್ನು ಕುರುಹಾಗಿಟ್ಟುಕೊಂಡು ಆತ್ಮೋನ್ನತ ಪೂಜೆಯನ್ನು ಒಪ್ಪಿದವರು, ಬಸವಣ್ಣನವರು,ಆ ಪ್ರಸಂಗದಲ್ಲಿ. ಲಿಂಗ ಮಾನವ ರೂಪ ತಾಳಿ ಕಾಯಕ ಮಾಡಿದೆ ಎಂದಿದೆ....ಇದನ್ನು ನಾವು ಒಪ್ಪಿದರೆ ಬಸವಣ್ಣನವರ ಆದರ್ಶಗಳು ಮತ್ತು ತತ್ವಗಳನ್ನು ದುರ್ಬಲಗೊಳಿಸಿದಂತಾಗುತ್ತದೆ, ಮತ್ತು ನಾವೇ ಸ್ವಯಂ ಮೌಢ್ಯಚರಣೆ ಮಾಡಿದಂತಾಗುತ್ತೆ,

ಈ ಪ್ರಸಂಗ ನಡೆದ ಸ್ಥಳ ಹೂಳಲ್ಕೆರೆ ತಾಲೂಕು ನುಲೇನೂರು ಗ್ರಾಮ ಈ ಗ್ರಾಮ ಅಭಿವೃದ್ದಿಗಾಗಿ ಬಕ ಪಕ್ಷಿಯಂತೆ ಕಾಯುತ್ತಿದೆ, ಲಿಂಗ ಜಾರಿದ ಸ್ಥಳ ರಾಮತೀರ್ಥ. ಈಗ ಬಟಾ ಬಯಲಾಗಿದೆ,ಈ ಗ್ರಾಮದಲ್ಲಿ ಅಭಿವೃದ್ದಿ, ಮರಿಚಿಕೆಯಾಗಿದೆ, 

ಕುಳುವ ಭಾಷೆಯನ್ನಾಡುವ ಸಮುದಾಯಗಳ ಕಾಯಕ ನಿಷ್ಠೆಯನ್ನು ಜಗತ್ತಿಗೆ ಪರಿಚಯಿಸಿದ, ಇಂತಹ ಶರಣರ ಪುಣ್ಯಸ್ಥಳಗಳು ಅವನತಿ ಅಂಚಿಗೆ ಸರಿದಿರುವುದು..! ಇವುಗಳನ್ನು ಸರ್ಕಾರ ಗಮನಿಸದೆ ಇರುವುದು ನಿಜಕ್ಕೂ ವಿಪರ್ಯಾಸ..?

ಆತ್ಮೀಯ ಕುಳುವ ಬಂಧುಗಳೇ.... ಬನ್ನಿ ನಮ್ಮ ಸಮಾಜದ ಸರ್ವ ಶ್ರೇಷ್ಠ ಶರಣ ನುಲಿಯ ಚಂದಯ್ಯ ನವರ ಸ್ಥಳಗಳನ್ನು ಪುನರುಜ್ಜೀವನಗೊಳಿಸಿ ಅಭಿವೃದ್ಧಿಗೊಳಿಸುವಂತೆ ಸರ್ಕಾರವನ್ನು ಒತ್ತಾಯಿಸೋಣ....!  ಸಂಘಟಿತರಾಗೋಣ.....!

ಮುಂದಿನ ಭಾಗದಲ್ಲಿ ಚಂದಯ್ಯನವರ ಮತ್ತಷ್ಟು ಸ್ಥಳಗಳನ್ನು ಪರಿಚಯಿಸುತ್ತೇನೆ.

ಮುಂದುವರಿಯುತ್ತದೆ....✍️

ಗುರುವಲ್ಲದ ಗುರು ಪಡೆದದ್ದು ಕೇವಲ ದಕ್ಷಿಣೆ ಅಲ್ಲ ತುಳಿತಕ್ಕೊಳಗಾದವರ ಬದುಕು

ಕುಳುವ ವಾಣಿ ಸಂದೇಶ...✍️

ದ್ರೋಣ ಹಾಗೂ ಏಕಲವ್ಯನ ಸಂವಾದ ಮೊದಲನೇ ಭಾಗದಿಂದ ಮುಂದುವರೆದು..

ದ್ರೋಣಾಚಾರ್ಯರು ಆ ಬಾಲಕನನ್ನು ಉದ್ದೇಶಿಸಿ... 

ಅಯ್ಯಾ ನಿನ್ನ ಮಾತುಗಳನ್ನು ಕೇಳುತ್ತಿದ್ದರೆ ನೀನೊಬ್ಬ ಪ್ರಭುದ್ಧ ಮೇಧಾವಿಂತೆ ಎಲ್ಲಾ ವಿದ್ಯೆಗಳನ್ನು ಕರತಲಾಮಲಕ ಗೊಳಿಸಿಕೊಂಡಿರುವವನಂತೆ ಕಾಣುತ್ತೀಯ, ಆದರೆ,......? 

ನಿನ್ನ ವೇಷಭೂಷಣಗಳನ್ನು ನೋಡಿದರೆ ಸ್ವಲ್ಪ ಆಶ್ಚರ್ಯವಾಗುತ್ತಿದೆ, 

ನಿನ್ನ ಹೆಸರೇನು..? ನಿನ್ನ ತಂದೆ ಹೆಸರೇನು..? ನೀನು ಯಾವ ಕುಲದವನು..? ಯಾವ ದೇಶದವನು..? ನಿಮ್ಮ ವೃತ್ತಿಯೇನು..? ಸ್ವಲ್ಪ ವಿವರವಾಗಿ ತಿಳಿಸು.

ಏಕಲವ್ಯ ಅಷ್ಟೇ ನಾಜೂಕಾಗಿ, ವಿನಯದಿಂದ ಉತ್ತರಿಸುತ್ತಾನೆ, 

ಗುರುವರ್ಯ ನನ್ನ ಹೆಸರು ಏಕಲವ್ಯ, ನನ್ನ ತಂದೆ ಹೆಸರು ಹಿರಣ್ಯಧನು, ನಾನು ಕಾಡಿನಲ್ಲಿರುವ ನಿಷಾದ ಕುಲದ ಬೇಡ ಜನಾಂಗದವನು, ನಾವು ಜರಾಸಂಧನ ಆಡಳಿತದಲ್ಲಿರುವ ದೇಶದ ಅವಿಭಾಜ್ಯ ಅಂಗದಲ್ಲಿರುವ ಕಾಡಿನಲ್ಲಿ   ವಾಸಿಸುತ್ತಿರುವೇವು,..

ನಿಮ್ಮಲ್ಲಿ ನಾನು ವಿದ್ಯೆಗಾಗಿ ಬಂದಿದ್ದೇನೆ,.ದಯಮಾಡಿ ನನಗೆ ಬಿಲ್ವಿದ್ಯೆ ದಾನ ಮಾಡಿ.

ಇದನ್ನು ಕೇಳಿದ ದ್ರೋಣರಿಗೆ ಸ್ವಲ್ಪ ವಿಚಲಿತವಾಗುತ್ತದೆ, ಇವನ ಮಾತುಗಳನ್ನು ಕೇಳಿ ಕ್ಷಣ ಕಾಲ ಸುಮ್ಮನಿದ್ದು ನಂತರ,

ಏಕಲವ್ಯನನ್ನು ಉದ್ದೇಶಿಸಿ ಕೇಳುತ್ತಾರೆ ಮಗು..!      ಈ ವಿದ್ಯೆಗಳೆಲ್ಲವೂ ರಾಜ್ಯವನ್ನು ಆಳುವ ಕ್ಷತ್ರಿಯ ಕುಲದ ರಾಜಕುಮಾರರು ಮಾತ್ರ ಕಲಿಯಬೇಕಾಗಿದೆ,  ನೀವು ಇದನ್ನು ಕಲಿಯುವುದು ಮತ್ತು ಗುರುಕುಲಕ್ಕೇ ಬರುವುದು ಧರ್ಮ ವಿರೋಧವಾಗಿದೆ..? ಹೀಗೆ ಹೇಳುತ್ತಲೇ ಕ್ಷಣ ಕಾಲ ಮೌನವಾದ ದ್ರೋಣರು, ಮನಸ್ಸಿನಲ್ಲಿ ತಾನು ಕೊಟ್ಟ ಮಾತನ್ನು ನೆನಪಿಸಿಕೊಳ್ಳುತ್ತಾ ಮನಸ್ಸನ್ನು ಗಟ್ಟಿ ಮಾಡಿಕೊಂಡು ಸ್ವಲ್ಪ ಕಠೋರವಾಗಿಯೇ ಏಕಲವ್ಯ ನನ್ನು ಉದ್ದೇಶಿಸಿ.

ನಿನ್ಯಾವ ಆಧಾರದ ಮೇಲೆ ಈ ವಿದ್ಯೆಯನ್ನು ಕಲಿತುಕೊಂಡೆ.. ? ಕಾಡುಗಳಲ್ಲಿ ವಾಸ ಮಾಡುತ್ತ ಹುಳ ಒಪ್ಪಟೆಗಳನ್ನು, ಗೆಡ್ಡೆ ಗೆಣಸುಗಳನ್ನು ತಿನ್ನುತ್ತಾ, ಬೇಟೆಯಾಡಿ ಪ್ರಾಣಿಗಳನ್ನ ಮಾಂಸಹಾರವನ್ನು ಸೇವಿಸುವ ಹೀನ ಕುಲದ ವ್ಯಕ್ತಿಯಾದ ನೀನು, ಶ್ರೇಷ್ಠ ಕುಲದ ವ್ಯಕ್ತಿಗಳು ಕಲಿಯುವ ವಿದ್ಯೆಯನ್ನು ಯಾವ ಮಾನದಂಡದಿಂದ ಕಲಿತೆ...?  ನಿನಗೆ ನಿನ್ನ ಮಾತಾಪಿತ್ರರು ಇದನ್ನು ಹೇಳಲಿಲ್ಲವೇ…?

ಧರ್ಮ ವಿರೋಧಿ ಚಟುವಟಿಕೆಗಳಲ್ಲಿ ನಾವುಗಳು ಭಾಗಿಯಾದರೆ ನಿನಗೂ ನಮಗೂ ಸಂಕಷ್ಟ ತಪ್ಪಿದ್ದಲ್ಲ ಈ ಕೂಡಲೇ ನೀನಿಲ್ಲಿಂದ ಹೊರಡು, ತಿಳಿದೋ ತಿಳಿಯದೆ ಮಾಡಬಾರದ ತಪ್ಪನ್ನು ಮಾಡಿರುವೆ ಇಲ್ಲಿಂದ ಈಗಲೇ ಹೊರಡದಿದ್ದರೆ ಆಗು ಈ ವಿದ್ಯೆಯನ್ನೆಲ್ಲ ಮರೆಯದಿದ್ದರೆ ನಿನ್ನನ್ನು ಬಟರನ್ನು ಕರೆಸಿ ಸೆರೆಮನೆಗೆ ದೂಡುತ್ತೇನೆ. ನೀನು ನಿನ್ನ ಮಾತಾಪಿತ್ರರು ಕಠಿಣವಾದ ಶಿಕ್ಷೆಯನ್ನು ಅನುಭವಿಸಬೇಕಾಗುತ್ತದೆ. ಇಲ್ಲಿಂದ ಈ ಕೂಡಲೇ ಹೊರಟು ಹೋಗು..ಎಂದು ಕಠಿಣವಾಗಿ, ಕಠೋರವಾಗಿ ಬಾಲಕನೆಲ್ಲದೆ ನಿಂದಿಸಿ ಬಿಡುತ್ತಾರೆ.

ಗುರುವರ್ಯ ನನಗೆ ಈ ಧರ್ಮ-ಕರ್ಮಗಳ ಅರಿವಿಲ್ಲ,.! ನಾನು ನಿಮ್ಮಲ್ಲಿ ಕೇವಲ ವಿದ್ಯೆ ಕಲಿಯಬೇಕೆಂಬ ಹಂಬಲದಿಂದ ಬಂದಿದ್ದೇನೆ ದಯಮಾಡಿ ಎಲ್ಲರಂತೆ ನನಗೆ ವಿದ್ಯೆಯನ್ನು ಕಲಿಸಿಕೊಡಿ…!

ಏಕಲವ್ಯನ ಈ ಮಾತನ್ನು ಕೇಳಿ ದ್ರೋಣಾಚಾರ್ಯರು ಮನಸ್ಸಿನಲ್ಲೇ ಮಮ್ಮಲ ಮರುಗುತ್ತಾ…."

ಹಿಂದೊಮ್ಮೆ ರಾಜರಿಗೆ ಅಲ್ಲದೆ ಬೇರೆ ಯಾರಿಗೂ ವಿದ್ಯೆಯನ್ನು ಕಲಿಸಿಕೊಡುವುದಿಲ್ಲ ಮತ್ತು ವಿಶೇಷವಾಗಿ ಅರ್ಜುನನನ್ನು ಜಗದ್ವಿಖ್ಯಾತ ಬಿಲ್ಲುಗಾರ ನನ್ನಾಗಿ ಮಾಡುತ್ತೇನೆ ಎಂದು ಶಪಥ ಮಾಡಿದ್ದನ್ನು ಮತ್ತೊಮ್ಮೆ ನೆನೆಯುತ್ತಾ., ಮನಸ್ಸನ್ನು ಗಟ್ಟಿ ಮಾಡಿಕೊಂಡು ಏಕಲವ್ಯನ ಮನವಿಯನ್ನು ತಿರಸ್ಕರಿಸಿಬಿಡುತ್ತಾರೆ"

“ಇಲ್ಲ ಇಲ್ಲ ನಿನಗೆ ವಿದ್ಯೆಯನ್ನು ಕಲಿಸಲಾಗುವುದಿಲ್ಲ ನಿಮ್ಮ ಜನಾಂಗಕ್ಕೆ ಗುರುಕುಲ ಧರ್ಮ ವಿರೋಧ,, ಇಲ್ಲಿಂದ ಹೊರಟು ಬಿಡು ನಮ್ಮಿಬ್ಬರ ಸಂಭಾಷಣೆಯನ್ನು ಬೇರೆ ಯಾರಾದರೂ ನೋಡಿದರೆ ಅನರ್ಥವಾದೀತು”, 

ಎಂದು ಕಠಿಣವಾಗಿ ನುಡಿದು ಭಾರವಾದ ಮನಸ್ಸಿನಿಂದ ಹೊರಟು ಹೋಗುತ್ತಾರೆ.. 

ಇತ್ತ ನಿರಾಸೆಯಿಂದ.., ಒಲ್ಲದ ಮನಸ್ಸಿನಿಂದ.., ಹೆಜ್ಜೆಯ ಮೇಲೆ ಹೆಜ್ಜೆಗಳನ್ನು ಇಡುತ್ತಾ.., ಕಣ್ಣಿನಲ್ಲಿ ನೀರನ್ನು ಜಿನುಗಿಸುತ್ತಾ,...                            ಏಕಲವ್ಯ ಮರಳಿ ಮನೆಗೆ ಬರುತ್ತಾನೆ, 

ಎರಡು ಮೂರು ದಿನಗಳ ನಂತರ ಏಕಲವ್ಯನಲ್ಲಿ ದಿಡೀರನೆ ಬದಲಾವಣೆಗಳು ಕಾಣುತ್ತವೆ, ಗೆಳೆಯರೊಂದಿಗೆ ಆಟವಾಡಲು ಹೋಗುವುದಿಲ್ಲ ಅಸ್ತ್ರ, ಶಸ್ತ್ರಭ್ಯಾಸಗಳಿಗೆ ಹೋಗುವುದಿಲ್ಲ, ಸರಿಯಾಗಿ ಊಟವನ್ನು ಮಾಡುವುದಿಲ್ಲ, ಮುಖದಲ್ಲಿ ಕಳೆಗುಂದತೊಡಗುತ್ತದೆ, ಕುಂತಲ್ಲೇ ಕುಳಿತುಬಿಡುತ್ತಾನೆ, ತದೇಕಚಿತ್ತದಿಂದ ಆಗಾಧವಾಗಿ, ಯೋಚಿಸುತ್ತಾ, ಯಾವುದೊ ಹೊರ ಹಾಕದೆ ಚಿಂತಿಸುತ್ತಿರುತ್ತಾನೆ… 

ದಿಡೀರನೆ ತನ್ನ ಮಗನಲ್ಲಿ ಆದ ಬೆಳವಣಿಗೆಗಳನ್ನು ಸೂಕ್ಷ್ಮವಾಗಿ ಕಂಡ ಹಿರಣ್ಯಧನು ಮಗನಲ್ಲಿ ಬಂದು ಕೇಳುತ್ತಾನೆ…

ಮಗು ಏಕಲವ್ಯ ಯಾಕೀ ವಿಪರೀತ ಯೋಚನೆ,.? ಯಾಕೀ ಬದಲಾವಣೆ..? ನಿಮ್ಮ ತಂದೆಯಾಗಿ ನಾನಿದನ್ನು ಕೇಳಬಹುದೇ,

ನಿನ್ನೀ ದುಗುಡಕ್ಕೇ ಕಾರಣವೇನು ಮಗು..?

ಅಪ್ಪ ನಾವು ಮನುಷ್ಯರಲ್ಲವೇ..? ನಾವು ಈ ಭೂಮಿಯ ಮೇಲಿನ ವಾರಸುದಾರರಲ್ಲವೇ..? ನಮಗೆ ಈ ಪ್ರಕೃತಿಯ ಮೇಲೆ ಅಧಿಕಾರವಿಲ್ಲವೆ..? ನಾವು ಗುರುಕುಲದಲ್ಲಿ ಶಿಕ್ಷಣ ಕಲಿಯಬಾರದೆ..? ನಮ್ಮ ಮೈಯಲ್ಲಿ ಹರಿಯುತ್ತಿರುವುದು ರಕ್ತವಲ್ಲವೇ..?ನಮ್ಮ ಜನಾಂಗ ಮಾಡಿದ ಅಪರಾಧವಾದರೂ ಏನು..? 

ಹನ್ನೆರಡು ಹದಿಮೂರು ವರ್ಷದ ಹಾಲುಗಲ್ಲದ ಕಂದಮ್ಮ, ಕಲ್ಮಶವಿಲ್ಲದ, ಕಪಟವರಿಯದ, ಮನಸ್ಸಿನಿಂದ ಆಡಿದ ಈ ಮಾತುಗಳನ್ನು ಕೇಳಿ ತಕ್ಷಣವೇ ಹಿರಣ್ಯಧನು ದಿಗ್ಭ್ರಾಂತನಾಗಿ ಬಿಡುತ್ತಾನೆ…? 

ಏನು ಉತ್ತರಕೊಡಬೇಕೆಂದು ತೋಚದೆ ಕ್ಷಣಕಾಲ ಮೌನವಾಗಿ ಬಿಡುತ್ತಾನೆ..?

ಹಿರಣ್ಯದನು ಹಾಗೂ ಏಕಲವ್ಯ ಸಂವಾದ ಮುಂದುವರೆದ ಭಾಗದಲ್ಲಿ.

ಮುಂದುವರೆಯುತ್ತದೆ…….

"ಏಕಲವ್ಯ ಕೊಟ್ಟಿದ್ದು ಕೇವಲ ಬೆರಳಲ್ಲ, ಗುರುವಲ್ಲದ ಗುರು ಎನಿಸಿಕೊಂಡ ದ್ರೋಣಾಚಾರ್ಯರು ಪಡೆದದ್ದು ಕೇವಲ ದಕ್ಷಿಣೆಯಲ್ಲ"

ಕುಳುವ ವಾಣಿ ಸಂದೇಶ...✍️

"ಏಕಲವ್ಯ ಕೊಟ್ಟಿದ್ದು ಕೇವಲ ಬೆರಳಲ್ಲ, ಗುರುವಲ್ಲದ ಗುರು ಎನಿಸಿಕೊಂಡ ದ್ರೋಣಾಚಾರ್ಯರು ಪಡೆದದ್ದು ಕೇವಲ ದಕ್ಷಿಣೆಯಲ್ಲ... 

ಇದರ ಮೂಲ ಅರಿವನ್ನು ತಿಳಿಸುವ ಒಂದು ಸಣ್ಣ ಪ್ರಯತ್ನ..

ನಿಷಾದ ಕುಲದ ಏಕಲವ್ಯನ ಮುಂದಿನ ಪೀಳಿಗೆಯವರು, ಭಾರತ ದೇಶಾದ್ಯಂತ ಹರಡಿದ್ದು ಇವರು ಹೆಚ್ಚಾಗಿ ದಕ್ಷಿಣ ಭಾರತದಲ್ಲಿ ಕಂಡುಬರುತ್ತಾರೆ, ಈಗಿನ ಆಂಧ್ರಪ್ರದೇಶದಲ್ಲಿರುವ ಏರುಕುಲ ಅಥವಾ ಯೆರವಕುಲಂ ಜಾತಿಯವರಾಗಿ ಗುರುತಿಸಲ್ಪಡುತ್ತಾರೆ,

(ಕರ್ನಾಟಕದಲ್ಲಿ ಕೊರಚ ಕೊರಮರು ಇದೇ ಪೀಳಿಗೆಯವರಾಗಿದ್ದು ಕರ್ನಾಟಕದತ್ತ ವಲಸೆ ಬಂದಿದ್ದಾರೆ ಎಂದು ಕೆಲವು ಸಂಶೋಧನೆಗಳ ಪ್ರಕಾರ ತಿಳಿಯಲ್ಪಡುತ್ತದೆ) 

ಇವರು ಈಗಲೂ ತಮ್ಮ ಕುಲಕಸುಬನ್ನು ಮಾಡುವಾಗ ಮತ್ತು ಸಣ್ಣಪುಟ್ಟ ಬೇಟೆಗೆ ಹೋದಾಗ ಹೆಬ್ಬೆರಳನ್ನು ಉಪಯೋಗಿಸದೆ ಇರುವುದು ಈತನ ವಂಶಸ್ಥ ಮಹಾನ್ ವ್ಯಕ್ತಿ "ಏಕಲವ್ಯನಿಗೆ" ಕೊಡುವ ಗೌರವ ಸೂಚಕವಾಗಿದೆ,.. 

ಕ್ರಿಸ್ತ ಪೂರ್ವದಲ್ಲಿ ದಕ್ಷಿಣ ಭಾರತದ ಕಡೆ ಅನೇಕ ಬುಡಕಟ್ಟು ಜನಾಂಗಗಳಿದ್ದು ಅದರಲ್ಲಿ "ನಿಷಾದ" ಕುಲವು ಒಂದು 

ನಿಷಾದ ಕುಲದ ನಾಯಕನಾದ.

ಹಿರಣ್ಯಧನು ಮತ್ತು ಶ್ರಾದ್ಧ ದಂಪತಿಯ ಮಗನೇ 

" ಏಕಲವ್ಯ "

(ಕೆಲವು ಕತೆಗಳ ಪ್ರಕಾರ ಏಕಲವ್ಯ ಹಿರಣ್ಯ ಧನುವಿನ ದತ್ತುಪುತ್ರ ಎಂದು ತಿರುಚಿ ಬರೆಯಲಾಗಿದೆ,) ಎಲ್ಲರಂತೆ ಏಕಲವ್ಯ ತನ್ನ ಕಾಡಿನಲ್ಲಿ ಆಡುತ್ತಾ ಆಟವಾಡುತ್ತಾ ಬೆಳೆಯುತ್ತಿದ್ದ, 

ಎಲ್ಲದರಲ್ಲೂ ಅತಿ ಹೆಚ್ಚು ತೀಕ್ಷ್ಣತೆಯನ್ನು ಹೊಂದಿದ್ದ, ಯಾವುದೇ ವಿದ್ಯೆಯಾಗಲಿ ಯಾವುದೇ ಕಲೆಯಾಗಲಿ, ಯುದ್ಧವಾಗಲಿ, ಬೇಟೆಯಾಗಲಿ, ಕ್ಷಣದಲ್ಲಿ ಕಲಿಯುತ್ತಿದ್ದ, ಬೆಳೆಯುತ್ತ ಬೆಳೆಯುತ್ತ ಈತ ಕಲಿತದ್ದು ಯಾವುದು ಇವನಿಗೆ ಉತ್ರ್ಪೆಕ್ಷೆ ಎನಿಸಲಿಲ್ಲ, 

ಇನ್ನೂ ಹೆಚ್ಚಿನದು ಯಾವುದನ್ನಾದರೂ ಕಲಿಯಬೇಕೆಂಬ ಆಸೆ ಇವನಲ್ಲಿ ಹೆಪ್ಪುಗಟ್ಟಿತ್ತು,..

 ಒಂದು ಸಾರಿ ಹೀಗೆ ಕಾಡು ಸುತ್ತುತ್ತ ಊರಿನ ಕಡೆ ಬಂದಾಗ ಊರ ಹೊರಗಡೆ ದ್ರೋಣಾಚಾರ್ಯರು ಪಾಂಡವರು ಮತ್ತು ಕೌರವರಿಗೆ ಯುದ್ಧ, ಮತ್ತು ರಕ್ಷಣಾ ಕೌಶಲ್ಯ ವಿದ್ಯೆ ಹೇಳಿಕೊಡುತ್ತಿದ್ದ ದ್ದನ್ನು ನೋಡಿದ..! ಅವರು ವಿದ್ಯೆಯನ್ನು ಕಲಿಯುತಿದ್ದ ರೀತಿಗಳನ್ನು ನೋಡಿದ..! ಎಲ್ಲ ವಿದ್ಯೆಯನ್ನು ತನ್ನ ಮನಸ್ಸಿನಲ್ಲಿ ಅಡಗಿಸಿಕೊಂಡ, ನಂತರ ತನ್ನ ಹಟ್ಟಿಗೆ ವಾಪಸಾದ ವಿದ್ಯೆಗಳನ್ನು ತಾನೇ ಕಲಿಯುತ್ತಾ ಕಲಿಯುತ್ತಾ ಬಂದ… 

ಅಲ್ಲಿ ದೂರದಿಂದ ನೋಡುವುದು, ಇಲ್ಲಿ ಬಂದು ಕಲಿಯುವುದು.. ಎಲ್ಲಾ ವಿಧ್ಯೆಯಲ್ಲು ಪಾರಂಗತನಾದ… 

ಆದರೂ.... ಅವನಿಗೆ ಮತ್ತಷ್ಟು ಏನಾದರೂ ಸಾದಿಸಲೇ ಬೇಕೆಂಬ ಹಂಬಲ ಹೆಚ್ಚುತ್ತಲೇ ಹೋಯಿತು.. 

ಒಮ್ಮೆ ದ್ರೋಣರನ್ನು ಭೇಟಿಯಾದ, ಅವರನ್ನು ತನ್ನ ಮನಸ್ಸಿನ ತುಂಬಾ ಗುರುವನ್ನಾಗಿ ಸ್ವೀಕರಿಸಿಕೊಂಡ, ಅವರಲ್ಲಿ ನಯವಾಗಿ ಅತಿ ವಿನಯವಾಗಿ ಕೀರಲು ದ್ವನಿಯಲ್ಲಿ ಅವರನ್ನು ಉದ್ದೇಶಿಸಿ ತನ್ನ ಮನದ ಹಂಬಲವನ್ನು ಅವರಲ್ಲಿ ತೋಡಿಕೊಂಡ.

ಗುರುವರ್ಯ ನಾನು.. ನಾನು.. ಮಲ್ಲಯುದ್ಧ, ದೃಷ್ಟಿಯುದ್ಧ,ಗದಾಯುದ್ಧ, ಕತ್ತಿವರಸೆ, ಕುದುರೆ ಸವಾರಿ, ಬಿಲ್ವಿದ್ಯಾ, ಭರ್ಜಿ ಎಸೆತದಂತ, ಅನೇಕ ವಿದ್ಯೆಗಳನ್ನು ಕಲಿತಿದ್ದೇನೆ.

 ಆದರೆ ಬಿಲ್ವಿದ್ಯೆ ಯಲ್ಲಿ ನಾನಿನ್ನೂ ಪರಿಪೂರ್ಣನಾಗಿಲ್ಲ, ಈ  ವಿದ್ಯೆಯನ್ನು ಕಲಿಯಬೇಕೆಂಬ ಹಂಬಲ ಹೆಚ್ಚುತ್ತಿದೆ.

ಬಿಲ್ವಿದ್ಯೆಯನ್ನು ಎಷ್ಟು ಕಲಿತರು ಮತ್ತಷ್ಟು ಕಲಿಯಬೇಕೆಂಬ ಆಸೆಯಾಗುತ್ತಲೆ ಇದೆ...

ದಯಮಾಡಿ ನೀವು ನನಗೆ ಈ ವಿದ್ಯೆಯನ್ನು ಸಂಪೂರ್ಣವಾಗಿ ಹೇಳಿ ಕೊಡಿ…

ಕೀರಲು ಧ್ವನಿಯಲ್ಲಿ ತನ್ನ ಮನದ ಇಂಗಿತವನ್ನು ಅವರಲ್ಲಿ ತೋಡಿಕೊಂಡ.

ಆಗ ದ್ರೋಣರು ಅರ್ಜುನನಿಗೆ "ಶಬ್ದವೇಧಿ" ಯನ್ನು ಕಲಿಸುತ್ತಿದ್ದ ಸಮಯ. 

ಒಮ್ಮೆ ಏಕಲವ್ಯನ ಕಡೆ ತಿರುಗಿ ನೋಡಿ ಅವನ ಮುಖದಲ್ಲಿ ಇದ್ದ ನಿರಾಳತೆ, ಮುಗ್ಧತೆ, ಹಾಲುಗಲ್ಲದ, ಚಿಗುರು ಮೀಸೆಯ, ಬಟ್ಟಲಗಲದ ಹಸುಳೆ ಕಣ್ಣಿನಲ್ಲಿ, ವಿಶ್ವವನ್ನೇ ಗೆಲ್ಲೆನೆಂಬೇ ಅಪರಿಮಿತ ಆತ್ಮವಿಶ್ವಾಸ, ತನ್ನ ದೇಹದಲ್ಲಿನ ಒಂದು ಅಂಗವೆಂಬಂತೆ, ಎದೆಗೆರಿಸಿದ ಬಿಲ್ಲು, ಹರುಳು ಉರಿದಂತೆ ಪಟಪಟನೆ ಉದುರಿಸಿದ ನುಡಿಮುತ್ತುಗಳು,

ಇವೆಲ್ಲವನ್ನು ಕಂಡು ಮನದಲ್ಲಿ ಹರುಷಗೊಂಡರು, ಅದನ್ನು ತೋರ್ಪಡಿಸದೆ ಅವನ ಅಂಗಾಂಗಗಳನ್ನು ಸೂಕ್ಷ್ಮವಾಗಿ ಗಮನಿಸಿದರು, ಇವನಿಗೆ ಶಿಕ್ಷಣ ಕೊಟ್ಟರೆ

ಇವನೊಬ್ಬ ಉತ್ತಮ ಚಕ್ರವರ್ತಿಯಾಗುವ ಎಲ್ಲಾ ಲಕ್ಷಣಗಳು ಇವೆಯಲ್ಲ, 

ಎಂದು ಮನದಲ್ಲೇ ಅರುಹಿಕೊಂಡರು,

ದ್ರೋಣ ಹಾಗೂ ಏಕಲವ್ಯನ ಸಂವಾದ ಮುಂದುವರೆದ ಭಾಗದಲ್ಲಿ....